Probablament la batalha mai importanta de l’istòria de las tèrras occitanas. L’an 1209 èra estada convocada pel Papa Innocenci III la Crosada contra los Albigeses (los Catars). Una armada dirigida per Simon de Montfòrt amb lo legal papat Arnaud Almaric de Citeaux, destruissiá las vilas occitanas amb capítols tan sagnants coma la massacre de Besièrs, la mòrt del vescomte Raimon Rogièr de Carcassona o los lenhièrs ont morissián los “eretges”.
Lo rei d’Aragon e comte de Barcelona Pèire, nomenat lo “Catolic”, decidiguèt ajudar als sieus nòbles occitans vassalhs e arturar la destruccion e la persecucion contra los Bons Òmes e las Bonas Femnas. Fin finala una batalha a començaments del mes de Setembre de 1213, al bòrd de la vila de Murèth, decidiriá l’an 1213 lo ganhant d’aquela Crosada e lo futur de las tèrras occitanas.
Simon de Montfòrt temiá la desbranda pr’amor que l’armada del rei Pèire èra mai nombrosa. Mas lo cap militar de la Crosada esperava un miracle, e pregava amb la siuena granda fe catolica per poder contunhar la lucha contra los “eretges”.
Pèire lo Catolic arribava amb una seguretat totala, mas fatigat, après la victòria dels reis crestians de la Peninsula Iberica contra los musulmans a la batalha de Las Navas de Tolosa l’an anterior. E la nuèch d’abans de la batalha, los sieus soldats comencèron a celebrar la victòria.
L’afrontament aguèt un resultat inesperat. Lo rei Pèire se vestiguèt coma un soldat per aténher de proteccion davant los enemics; los crosats enemics encerclèron “lo fals rei” e l’auciguèron. Comencèron a cridar “lo rei es mòrt” e lo monarca respondèt que lo rei èra el. Aqueles meteisses soldats enemics l’ataquèron e moriguèt. Cossí estipulan las nòrmas de las batalhas, quand lo monarca morís, aquela armada es derrotada.
Amb la mòrt del rei Pèire, Simon de Montfòrt aviá pas una autra armada enemiga que poguèsse l’arturar e la Crosada contunhèt per d’autras vilas de las tèrras occitanas. L’illusion catalana a Occitània desapareissiá. La Granda Corona d’Aragon veniá una quimèra. E las tèrras occitanas demorarián dins de França.
