Qué ei eth Recuelh basic de Cant Liturgic d’Es Paoms?
Eth Recuelh basic de Cant Liturgic ei un projècte d’Es Paoms que vò aufrir as parròquies e as comunitats dera Val d’Aran un repertòri de cants liturgics en aranés, pensat entàs celebracions dera missa e entara participacion dera assemblada.
Eth libre amasse cants que se canten enes parròquies araneses, pèces vinculades ara activitat dera corau Es Paoesses e d’auti cants accessibles entàs coraus e entath conjunt des fidèus.
Coma nauetat, ath delà des letres, eth recuelh includís es partitures entà piano, damb es acòrds corresponents, entà facilitar er acompanhament musicau.
Aguest projècte vò contribuir a preservar e promòir er usatge der aranés ena liturgia e a mantier viu eth ligam entre lengua, cultura e vida comunitària. Ei ua prumèra edicion, dubèrta a futures ampliacions.
Un toc artístic entath Recuelh basic de Cant Liturgic en aranés
Volem que, ath delà de preservar e promòir eth cant liturgic en aranés, aguest recuelh sigue tanben ua petita òbra artistica que combine era musica, era lengua e eth patrimòni culturau de Vilamòs.
Per açò, auem era collaboracion der artista Sergi Manzaneque Castet, vinculat a Vilamòs, que realizarà diuèrsi dessenhs a lápis inspiradi en elements dera glèisa de Santa Maria de Vilamòs. Aguesti dessenhs s’aniràn incorporant ath long deth libre, en tot acompanhar es cants e aportar ua dimension artistica e visuau ath projècte.
D’aguesta manèra, eth Recuelh basic de Cant Liturgic en aranés vò èster mès qu’un cançonèr: un punt de trobada entre era lengua, era musica, er art e era identitat deth nòste pòble.
Com i pòs collaborar?
Eth Recuelh basic de Cant Liturgic ei un projècte collectiu que vò contribuir a mantier viu er aranés ena liturgia e a preservar eth nòste patrimòni culturau.
Entà hèr realitat aguesta edicion, auem besonh dera collaboracion de persones, familhes, empreses e institucions que compartisquen aguesta volontat. Pòs participar-i de dues manères:
Mecènes – 60€
Adreçat a persones, familhes, empreses o institucions que vòlen hèr ua aportacion economica destacada ath projècte. En reconeishement ath sòn supòrt, eth sòn nòm o logotip apareisherà de forma destacada en libre e receberàn 5 exemplars deth Recuelh basic de Cant Liturgic.
Benefactor – 20 €
Adreçat a totes es persones que vòlen collaborar damb ua aportacion economica de 20€. En senhau d’arregràïment, eth sòn nòm serà mencionat en libre e receberàn 1 exemplar deth Recuelh basic de Cant Liturgic.
Més informacion a
https://www.espaoms.com/recuelh
Damb eth supòrt de totes e toti, podem hèr a sonar er aranés enes nòstes celebracions.
