Eth hilat d’escòles associatives d’immersion lingüistica Calandreta a estat guerdonat damb eth 9au Prèmi Robèrt Lafont, era nauta distincion qu’autrege era Generalitat de Catalonha entà reconéisher era defensa e promocion dera lengua occitana. Eth guerdon se liurèc en un acte solemne presidit per Auble. Sr. F. Xavier Vila, conselhèr de Politica Lingüistica, que se debanec eth passat dia 17 de seteme en Palau Centelles de Barcelona e compdèc damb era participacion de diuèrses figures destacades deth mon culturau, academic e institucionau occitanista.
Pendent era sua intervencion, eth conselhèr Vila, que presidic tanben eth jurat deth Prèmi, laudèc er engatjament deth hilat escolar e destaquèc qu’es calandretes an artenhut de convertir «era escòla en un espaci a on er occitan non ei sonque objècte e mejan d’aprendissatge, mès qu’ei tanben airina de socializacion, veïcul de coesion e part essenciau dera identitat der alumnat». Eth conselher auec tanben paraules de mercejament entàs entitats catalanes e occitanes que trabalhen entara promocion dera lengua occitana, entre es quaus, Sapiéncia Occitana.
Era ceremònia, condusida pera jornalista aranesa Ares Riu, compdec damb era participacion deth filològ e investigador Jaume Figueras, que hec ua glòsa d’aumenatge ara entitat guerdonada on soslinhèc era importància deth sòn projècte educatiu entara subervivença dera lengua. Era nòta culturau dera serada anèc a cargue deth musician e poèta Rodin Kaufmann, qu’aufric ua lectura poetica ath delà d’ua actuacion musicau.
Pera sua part, es representants dera Calandreta, Joan-Lois Blenet e Patrici Baccou, dus des tres copresidents dera Federacion, mecegèren eth reconeishement enes sòns parlaments, en qué meteren en valor eth trabalh abnegat e sostengut pendent decades qu’a permetut amiar endeuant eth projècte. Er acte compdèc, ath delà, damb era preséncia ena sala d’auti membres dera Calandreta, que voleren èster presents en un moment tan significatiu e emotiu entara comunitat educativa occitanista.
Eth liurament deth guerdon a estat era materializacion dera decision prenuda per unanimitat per un jurat format, ath delà deth conselhèr F. Xavier Vila, per Joan Santanach, Jordi Suïls, Xavi Gutiérrez, Verònica Barés e Miquèu Segalàs, fòrça des quaus se trapauen tanben entre es assistents.
Article d’Agustí Farran.
