Era Fondacion Ager convoquèc arunan era prumèra edicion des Prèmis des Letres Mn Amiell, dedicadi a promòir era creacion literària en lengua occitana. Laguens deth certamen i aueren tres categories, ua dedicada ara poesia, ua auta ara narrativa e ua auta ara promocion dera lengua e era cultura occitanes.
Eth prumèr prèmi poetic siguec entà Gustavo Vega e era sua poesia visuau, eth narratiu, entà Antòni Nogués pes sues traduccions tar aranés des classics dera literatura universau e eth dedicat ara promocion lingüistica e culturau entara Associacion entara Difusion d’Occitània en Catalonha (ADOC) peth sòn diari digitau Jornalet e eth sòn programa de pòdcasti País Invisible.
Laguens d’aguesta darrèra categoria, artenhec eth prumèr accessit Christian Andreu peth sòn prètzhèt coma director des revistes dera Associació d’Amics de la Sapiéncia Occitana (AASOC).
Ara era Fondacion Ager a convocat era dusau edicion des Prèmis Mn Amiell, mès tanben a estat editat eth libre dera prumèra edicion, a on podetz trapar informacion sus es guanhadors e es finalistes dera prumèra edicion. Aguest libre pòt consultar-se enes bibliotèques de Vielha e Salardú e ena sedença der Institut d’Estudis Aranesi – Acadèmia Aranesa dera Lengua Occitana.
Fòrça viatges es projèctes occitanistes non gaudissen dera visibilitat de besonh. Es Prèmis Mn Amiell, que pòrten precisament eth nòm d’ua des personalitats que se dediquèc a promòir era literatura aranesa e, mès que mès, era òbra deth gran poèta dera Val, Mn Jusèp Condò Sambeat, ajuden a trincar aguesta invisibilitat.



