Eth Hestivau Black Mountain celèbre enguan era sua onzau edicion, que se debanarà –peth prumèr viatge, en Vielha– deth 27 d’abriu enquiath 3 de mai, en tot consolidar-se coma ua des cites literàries de referéncia enes Pirenèus. Es promotors deth certamen José Luis Muñoz e Lluna Vicens ne heren era presentacion en Barcelona eth passat 9 d’abriu ena Llibreia de la Imatge.
Tradicionaument estacat a Bossòst, eth hestivau manten eth sòn esperit originau: presentacions literàries, taules redones, debats e un ampli ventalh d’autors convidadi. Ath long deth hestivau se liuraràn es Prèmis Black Mountain de novèlla nera, eth IV Prèmi Fernando Marías de novèlla –a Víctor Claudín peth sòn roman Vivo en la oscuridad– e eth Prèmi ara Trajectòria, qu’aguesta edicion requè en José Váccaro Ruiz, present en acte.
Era programacion includís tanben d’autes disciplines artistiques, coma eth cinèma, damb era collaboracion de Jaume Turmo, dinamizador culturau e projeccionista deth cinèma de Vielha, e era musica en dirècte, damb era actuacion deth grop Cangats.
Era organizacion exprimic es sòns arregraïments ar Ajuntament de Vielha e Mijaran, ara Deputacion de Lhèida, ara Bibliotèca Generau de Vielha, as libraries Eterna e Era Alquimia, ath Parador de Vielha e ar Otèl Garona de Bossòst –qu’aufrissen prètzi especiaus entara escadença–, atau coma a totes es persones que hèn possible eth hestivau.
S’eth temps acompanhe, eth programa includirà ua excursion tàs Uelhs deth Joèu, e era jornada se clauarà damb un sopar de clausura.
Damb aguesta naua edicion, Black Mountain enfortís era sua vocacion de pònt culturau entre literatura, territòri e comunitat.
