S’existís un encastre a on era lengua occitana e era sua modalitat aranesa gaudissen d’ua bona salut, ei ena musica. Grops de pertot des tèrres occitanes compausen o reinterprèten es classics. Aguest ei eth cas des Aranèrs, un grop aranés de musica qu’a evolucionat des dera sua creacion.
Enguan eth grop ei format per cinc components: Joan Masana i Jovells, qu’incorpòre es veus e tòque eth baish, Miquel Àngel Curtó i Frau, tanben as veus e que tòque era bateria, Imma Farré i Monells, pianista, que premanís es arrengaments, Josep Rebull i Curcó ath saxofòn e Toni Llobera i Pasqual ara guitarra.
Pendent aguesta primauera, Aranèrs entamene ua gira pes diuèrses localitats dera Catalonha de Ponent, portant era sua musica, mès tanben en tot promòir era lengua e era cultura populara pròpries dera Val d’Aran.
Bères ues des cançons que formen part deth sòn repertòri son “Net de huec, net d’amor”, “Oxitònia” o “Hilh”, qu’an estat musicades per Jaume Masana; mès es assistents as concèrts poiràn gaudir tanben de cançons d’arraïtz gascona, coma eth classic “De cap tà l’immortèla”, “Cent cops de bastó” o “Adieu-siatz!”.
Eth pròplèu dia 19 d’abriu començaràn era sua gira en Massalcoreig, ena plaça de deuant dera glèisa e organizada pera regidoria de Cultura, damb era Sra. Teresa Justé ath sòn deuant, e eth dia 25 d’abriu, en encastre dera setmana culturau de Sant Jòrdi, en Parc Municipal de Bell-lloc d’Urgell, un municipi a on era còsso Lluïsa Pla a defensat un programa de grops musicaus d’ua grana qualitat, en tot qu’en Menàrguens eth concert d’Aranèrs se debanarà eth dia 10 de mai. En eth barri de Cap Pont de Lhèida tanben haràn un concèrt eth dia 14 de junh (20.00) organizat pera Associacion de Vesies e de Vesins, damb era collaboracion dera sua presidenta Vení Ros. Tanben i a previsti de concèrts en Artesa de Lleida e damb er Orfeó Lleidatà.
En tot conversar, Joan Masana mos comente qu’eth grop neishec laguens der entorn dera associacion culturau aranesa Es Paoms. Aranèrs a evolucionat des d’uns ritmes mès de rock entà ua interpretacion de classics aranesi e d’autes origines, subertot gascons.
Entath grop era utilizacion der aranés ei ua mèrca d’identitat e des ligams que mantien es sòns membres respècte dera Val. Pendent es sòns concèrts non se limiten a interpretar es diferenti tèmes, senon qu’expliquen, cada tres cançons, er argument e eth procès de creacion de cada ua d’eres.
