ER INSTITUT D’ESTUDIS ARANESI – ACADÈMIA ARANESA DERA LENGUA OCCITANA (IEA-AALO) inaugurèc aguest an passat era sua prumèra sedença dehòra dera Val d’Aran. E era ciutat trigada siguec Barcelona, eth caplòc catalan, pr’amor des intenses relacions qu’aqueth manten damb er INSTITUT D’ESTUDIS CATALANS (IEC). De hèt, andues institucions son era maxima representacion dera recèrca e deth coneishement enes sòns encastres territoriaus respectius. Damb era creacion d’aguesta prumèra sedença, er IEA-AALO entamene ua fèrma expansion dera sua influéncia enlà des termières araneses.
Auem visitat era sedença barcelonina der IEA-AALO, en carrèr Maria Aurèlia Campmany, a on compartís emplaçament damb eth madeish IEC. Laguens d’aguesta sedença poderatz trapar ua grana varietat des libres publicadi per IEA-AALO, coma diccionaris –monolingües e bilingües–, classics dera literatura universau reviradi ar aranés o libres dedicadi as estudis sus diferentes disciplines relacionades damb Aran, coma era geografia, era istòria o era cultura tradicionau deth territòri. Tota ua hièstra tara realitat aranesa en centre de Barcelona. Non podem desbrembar qu’era lengua occitana ei tanben oficiau en tota Catalonha des der an 2006 arran dera reforma der Estatut d’Autonomia catalan.
Eth centre ei dubèrt cada dimars e dijaus obrants de 15.30 a 18.30 ores. Arregraïm era atencion e es explicacions de Miquel Vila pendent era nòsta visita.
Arregraïm era traduccion deth tèxte a Agustí Farran.
