Ei neishuda era prumèra edicion deth Prèmi des Letres Mossen Amiell damb tres categories entà ajudar era creacion e promocion der occitan. Aguesti prèmis vòlen èster un referent dera creacion literària occitana e tanben ua promocion d’aguesta cultura. Es candidatures se poden presentar enquiath 10 de deseme d’aguesta annada.
Eth responsable darrèr ei era Fondacion Ager, qu’a eth supòrt der Institut d’Estudis Aranesi – Academia Aranesa dera Lengua Occitana e deth Departament de Cultura dera Generalitat de Catalonha. Atau ei neishut un concors entà promocionar er occitan e tanben aumenatjar Mossen Amiell Solè (1930-2024), que siguec cluau ena defensa deth patrimòni culturau aranés.
Eth concors a tres modalitats. Era prumèra ei dedicada ara narrativa e òbra literària o de divulgacion e admet racondes, novèlles e asssaji o òbres de recèrca en quinsevolh des varietats dera lengua occitana. Era dusau modalitat ei dedicada ara poesia e includís amassades poetiques e projèctes de poesia visuau, soora o experimentau. Fin finau, era tresau modalitat ei dedicada a aqueri trabalhs individuaus, collectius o institucionaus que hèn era difusion der occitan e que tanben trabalhen pera sua normalizacion.
Totes es varietats dialectuaus
Es Prèmis Mossen Amiell admeten totes es òbres non premiades abans mès pòden èster inedites o ja publicades. Açò ei atau pr’amor que se vò facilitar enguan era paricipacion deth trabalh d’autors o collectius que ja son ua realitat. E es trabalhs pòden èster presentadi en totes es formes dialectaus occitanes.
Es persones o collectius que vòlen participar en aguesti prèmis pòden presentar es sòns trabalhs abans deth 10 de deseme d’enguan tostemp en format PDF ena adreça administracion@institutestudisaranesi.cat en tot escríuer “Prèmis Mn. Amiell 2025 – [Modalitat]”. Solament se pòt presentar ua sola òbra en cada modalitat e tostemp jos pseudonim.
Era jurada ei formada per especialistes literàris o filològs de lenga occitana. Açò ei atau pr’amor que se vò auer paritat e diversitat territoriau. Eth resultat dera decision dera jurada serà publicada en madeish mes de deseme e eth liurament se debanarà ena Val d’aran durant era fin deth mes de deseme, damb ua retransmission en dirècte. Es òbres premiades seràn publciades e seràn difonudes enes bibliotèques e centres culturaus dera Val d’Aran.
