Lo 23 d’abril a la vila catalana de Sant Andreu (Rosselló -Rousselhon) podètz assistir a una interessanta conferéncia del mèstre lautiër Nicolas Dedieu consacrada a un dels instruments musicals mai importants de l’Edat Mejana, la viòla d’arc. Aquela conferéncia serà acompanhada d’un concèrt amb Claudio Cuadros. Ne parlam amb Nicolas Dedieu.
CIRCUITOC.- La viòla d’arc es un instrument basic de la musicologia medievala. Una caracteristica que distinguís aquel instrument.
NICOLAS DEDIEU.- La viòla d’arc es un instrument medieval a l’encòp simple e expressiu, reconeissable a sas formas variadas e artisanalas, sovent alongadas o arredondidas. Possedís generalament tres a cinc còrdas, de còps amb de bordons qu’acompanhan la melodia, e se jòga amb un arquet convèx. Sa sonoritat es doça, cauda, rasposa e leugièrament nasala, mens poderosa qu’un violon modèrn, mas plan adaptada al cant e a las musicas de cort o popularas. Plegadís dins sa tenguda e son acòrdi, miralha l’esperit de son epòca, ont cada instrument èra unic e pensat per acompanhar la votz e contar d’istòrias.
C.- La viòla d’arc es estada l’antecessora d’autres instruments mai actuals?
N.D.- La viòla d’arc emblematica de l’Edat Mejana, pòt pas èsser considerada coma l’unic ancessor del violon, mas puslèu coma l’un dels malhons essencials d’una evolucion organologiqua complèxa que, a la Renaissença, abotirà a la naissença del violon modèrn en Itàlia.
C.- Quinas cançons interpretaretz pendent lo concèrt?
N.D.- Companho farai un vers pauc convinen (Guilhem IX)
Lo bel dos temps me platz (Blacatz)
Aital dona (Berenguier de Palazol)
Tant m’abelis (Berengier de Palou)
A virgen mui gloriosa (Instrumental)
Miragres fremos faz Santa Maria
Ab lo cor tris’environat d’esmay (Trobairitz anonyme)
Nuills hom no s’aucir tan gen (Peirol)
Cel que ne vol auzir chansos (R. de Miraval)
Bel m’es qu’ieu chant e coindèi (R. de Miraval)
C.- Aquel interessant acte cultural serà lo jorn de Sant Jordi. Es estada la data escuelhuda per aquel motiu?
N.D.- L’associacion Botiòlas Culturalas de Sant Andreu per la Sant Jordi, dins l’encastre de sa programacion consacrada al Reialme de Malhòrca en Rosselhon (1262–1344), a descobèrt mon trabalh per mon sit « Lutherie occitana ». Interessada per ma restitucion de la “viòla d’arc” del Palais dels Reis de Malhòrca, realizada segon lo plafon pintrat del balet de la reina, m’a convidat a prepausar una conferéncia acompanhada d’un concèrt a l’entorn d’aquel instrument.
Una granda jornada cultura per remembrar la musica medievala.
