La viticultura es una pèça basica de l’economia de las tèrras occitanas dempuèi los tempses de la colonizacion grèga. Los camps de vinhas son estats presents totjorn en lo païsatge occitan. L’an 1907 comencèt la revòlta dels vinhairons, una mobilizacion transversala que’agropèt tota la societat occitana contra la competéncia desleiala dels vins que provenián d’Algèria e per la relaxacion de la legislacion que regulava la qualitat del produit.
Probablament la primièra granda manifestacion dels occitans en l’epòca contemporanèa. La filloxèra, una malautiá de las vinhas, aviá limitat las del nòrd francés e l’arribada de vins algerians de mens qualitat e la permissibilitat davant la preséncia de sucre abans de la fermentacion per incrementar la graduacion alcoolica que prejudiciava l’image de qualitat dels vins, provoquèt la reaccion dels vinhairons e de tota la societat occitana.
Lo principal dirigent de la revòlta dels vinhairons foguèt Marcellin Albèrt, un proprietari d’Argelièrs, qui trabalhava unas vinhas familialas. Dempuèi l’an 1902 comencèt una campanha d’informacion entre los autres proprietaris per aténher la creacion de comitats amb la tòca de defendre los interèsses dels vinhairons lengadocians.
Mas foguèt l’an 1907 quand atenguèt agropar uns quaranta proprietaris de la meteissa vila d’Argelièrs amb l’intencion d’arribar a Narbona e d’expausar los problèmas de la viticultura del territòri a una delegacion de l’Assemblada Nacionala. Devián pressionar mai las institucions e comencèron unas mobilizacions per tot lo territòri (tanben a la Catalonha del Nòrd). Foguèt fondat lo Comitat de defensa viticola.
La cançon “La Vigneronne” venguèt l’imne de la revòlta e lo jornal setmanièr “Le Tocsin” la publicacion qu’informava dels actes del movement. Las primièras manifestacions mobilizèron solament unes milièrs de personas, mas los discorses de Marcellin Albèrt, amb una perfiècha oratòria, encoratjavan los assistents a contunhar.
Cada nòva mobilizacion setmanièra dels vinhairons èra mai nombrosa que l’anteriora. Lo 31 de març unes cinc cents manifestants a Bisa de Menerbés mas lo 21 d’abril èran quinze mil a Cabestanh. A Narbona arribèron a la chifra de 90.000 personas (lo 5 de mai) e a Besièrs cent cinquanta mil (lo 12 de mai). Èran de mobilizacions amb la preséncia de totas las classas socialas e de totas las ideologias politicas, pr’amor que la tòca de defensa de l’economia del territòri èra comuna. A la manifestacion de Besièrs tanben intervenguèt lo polític socialista Joan Jaurés.
A Perpinhan (Catalonha) dos cents mila assistents, a Carcassona dos cents cinquanta mila, a Nimes tres cents mila e fin finala a Montpelhièr sèt cents mila. Lo govèrn francés temiá las consequéncias del conflicte. Començavan a aparéisser qualques rambalhs a la carrièra pendent lo mes de Junh. Lo primièr ministre Georges Clemenceau envièt l’armada e la repression encoratgèt encara mai la populacion. Mas lo 17en regiment d’infantariá volguèt pas aubedir las òrdres e confraternizèt amb los manifestants. Èra lo moment del dialòg. La revòlta prejudiciava la problematica politica francesa de l’epòca.
Pendent la repression, Marcellin Albèrt, perseguit per la polícia, èra arribat a París. Lo primièr ministre Georges Clemenceau recebèt al dirigent lengadocian e acordèron calmar las revòltas e enebir las adulteracions del vin. Marcellin Albèrt recebèt cent francs per pagar lo sieu retorn al Lengadòc, mas la premsa expliquèt qu’aviá vendut la revòlta per recebre el meteis una compensacion economica. Albèrt venguèt un traïdor pels sieus vesins.
Malgrat aquelas circonstàncias, foguèron aprovadas de leis a l’Assemblada Nacionala que protegissián los vinhairons de la competéncia dels vins “adulterats”. Aqueles devián remarcar qu’èran pas vins obtenguts amb los procediments tradicionals. Foguèt creada la Confederacion Generala de Vinhairons del Sud, una entitat per protegir los interèsses. Tornava la patz a las tèrras lengadocianas, mas foguèt la primièra granda mòstra d’union dels occitans per defendre l’economia e lo territòri.
L’AASOC TOTJORN AMB LA SAPIÉNCIA !!!
L’AASOC TOTJORN AMB L’OCCITAN !!!
