Independentament des credences religioses de cada un, eth cristianisme a agut ua importància capitau ena istòria e era cultura occidentaus. Eth libre “Era Glèisa ena Val d’Aran”, publicat per Institut d’Estudis Aranesi – Acadèmia Aranesa dera Lengua Occitana mos aufrís ua ampla vision dera istòria de la Glèisa catolica en territòri aranés.
Aqueth libre apòrte un interès especiau per auer estat escrit per Mn Jusèp Amiell Solé, gran coneishedor dera istòria e era cultura araneses, e subertot dera òbra de Mn Jusèp Condò Sambeat, eth gran poèta d’Aran. Malerosament, Mn Amiell defuntèc er an 2024, en tot deishar un gran legat d’estudi.
Laguens deth libre podem trobar era istòria dera Glèisa catolica aranesa, damb era participacion des prumères comunitats cristianes, era consolidacion ena epòca medievau, era intensa relacion damb eth bisbat vesin de Comenge, era importància d’Aran coma lòc de refugi pendent era Revolucion Francesa, eth traspàs ath bisbat d’Urgelh o era adaptacion as tempsi modèrns ath long des sègles XIX e XX.
Eth libre non desbrembe tanpòc era consolidacion des romieuatges, es processions o es santuaris d’Aran, coma expression dera cultura populara e tradicionau. Atau madeish, s’i pòt trobar fotografies antiques e modèrnes de bères ues des glèises mès importantes dera Val d’Aran.
