Acte d’inauguracion brilhant dera delegacion der Institut d’Estudis Aranesi – Acadèmia Aranesa dera Lengua Occitana en Barcelona eth passat diuendres 3 d’octobre. A compdar d’ara, era capitau catalana gaudirà d’ua major preséncia dera lengua occitana-aranesa e dera sua cultura. Er occitan ei lengua oficiau en tot Catalonha des der an 2006, e aguesta dubertura en Barcelona, ajudarà sense dobte a consolidar aguesta oficialitat.
Era sedença ei enes installacions der Institut d’Estudis Catalans, ua mòstra dera relacion excellenta que mantien andues entitats. Coma rebrembèc era Presidenta de l’IEC, Teresa Cabré i Castellví, es situacions e es problematiques de totes dues lengües e cultures son similares, e era collaboracion pòt devier fòrça fructifèra.
Eth discors inaugurau de Jèp de Montoya, president der IEA-AALO, remerquèc diferenti punts a considerar. Era metuda en marcha d’aguesta delegacion ei un projècte de futur, entà palliar eth deficit istoric dera preséncia der aranés-occità ena capitau catalana e entà hèr realitat era oficialitat consagrada en article 6 der Estatut d’Autonomia de Catalonha. Rebrembèc tanben que, damb aguesta delegacion barcelonina, era lengua e era cultura araneses artenheràn mès visibilitat e ua revalorizacion que mostraràn er IEA-AALO coma institucion de referéncia dera lengua aranesa-occitana.
Er acte compdèc damb dues conferéncies. Patrici Pojada, president der Institut d’Estudis Occitans e membre dera Seccion Istorico-Arqueologica der Institut d’Estudis Catalans aufric as assistents era conferéncia damb eth títol “Col·laborar al servei de la llengua occitana: un projecte per al futur compartit”. Patrici Pojada rebrembèc era importància dera collaboracion entre institucions e se com era òbra der IEC pòt èster un referent entar IEO o er IEA-AALO, mès ath madeish temps se com era acadèmia aranesa pòt èster tanben un referent entà toti es territòris occitans. Coma president der IEO, defenec tanben era importància dera sua institucion e eth besonh de potenciar era promocion dera recèrca academica e dera socializacion e era reivindicacion dera lengua.
Ena dusau conferéncia, “Occità i Català. Llengües bessones per genètica o per alletament?”, Ramon Sistac, membre dera Seccion Aranesa der IEA-AALO e dera Seccion Filologica der IEC, comparèc era situacion de totes dues lengües, a nivèu demografic (nombre de parlants), es diferéncies dialectaus, en tot senhalar era filiacion deth catalan respècte der occitan e era importància des Pirenèus coma punt de trobada entre totes dues nacions. Tota ua classa magistrau de filologia e istòria.
Er Aunorable Conselhèr de Politica Lingüistica, Francesc Xavier Vila, remerquèc tanben era inauguracion d’aguesta delegacion barcelonina der IEO-AALO coma un eveniment istoric d’importància màger entà potenciar era lengua aranesa-occitana en Catalonha e entà un milhor coneishement mutuau.
Pendent er acte, eth cantautor occitan interpretèc dues cançons en aguesta lengua, “Altas ondas”, deth trobador deth sègle XII Rainbaut de Vaquèiras, e “Cavalièr”, der escrivan Robèrt Martí.
Un gran acte de presentacion qu’amassèc era màger part der occitanisme present en Barcelona e es sòns entorns.
