Ua nauetat literària entà mainatges en aranés. “Era Capsa de galetes”, d’Odense Books, dedicada a hèr a conéisher as mainatges era diuersitat ena escòla. Escrit per Jaume Espí, mèstre e pedagòg ena ciutat de Vic, a estat editat tanben en catalan e en castelhan. Ne parlam damb er autor.
1.- Era tua experiéncia coma mèstre deu auer estat determinanta entà escríuer aguest libre. Quin ei er objectiu dera publicacion d’“Era capsa de galetes”?
Er objectiu deth conde “Era capsa de galetes” ei de rénder visibla era grana diuersitat qu’existís enes nòsti centres educatius, naturalizar era diferéncia e promòir ua inclusion reau.
2.- Era diuersitat, un tèma qu’ei present en debat politic e sociau. Com plantege eth libre es beneficis e es rèptes dera diuersitat?
Eth conde plantege eth besonh d’apropar-se as persones que son presentes en nòste dia a dia pr’amor de descorbir-ne era riquesa que pòrten laguens, en tot perméter ua interaccion que generarà ua riquesa compartida. Es beneficis son innombrables e es rèptes enòrmes; per aquerò cau començar a generar concèptes tan importanti coma es de diferéncia, comunitat diuèrsa, collectivitat sense exclusions, empatia emocionau, gestion des emocions e molti d’auti entre es mès petiti pr’amor que, de mès grani, possedisquen estrategies solides e recorsi d’autogestion deth sòn benèster emocionau e de comprension deth mauestar pròpri e des auti.
3.- Observam actuaument ua cèrta radicalizacion enes adolescents. Quines valors aurie de transméter eth sistèma educatiu?
Tant eth sistèma educatiu coma es centres escolars e es professionaus dera educacion son un des pilars fondamentaus ena consolidacion e era transmission de valors entre er alumnat; mès non ei er unic, pr’amor qu’era família n’ei eth generador e transmetedor principau, tot e que soent non van guaire dera man; ad aquerò cau somà’i ua seriosa manca de recorsi, ràtios molt nautes enes aules, manca de professionaus especializadi e uns pressupòsti estancadi que non priorizen er exit deth sistèma educatiu actuau. Non podem arténher ua inclusion escolara plea se non disposam de recorsi entà amiar-la ara practica. Sò deth vejaire que non ei pas que mos trapam ath deuant d’ua manca o d’ua pèrta de valors, coma senhalen molti; çò que i a ei mès lèu ua desconnexion, un desequilibri de valors contraposades, ua manca de comprension entre es actors dera societat. Eth sistèma educatiu navègue per inèrcia –e encara sòrt!–, gràcies as professionaus qu’un dia e un aute apòrten ua valor considerabla entà qu’es alumnes auancen, maugrat qu’ei cèrt qu’er objectiu finau, aquerò nomentat “perfil de gessuda”, non se correspon damb era realitat que viuen es centres actuaument.
4.- Eth libre a estat publicat tanben en aranés. Era edicion en aguesta lengua non ei facila abituaument. Com a estat eth procès?
Era publicacion deth conde en aranés ère prevista des deth moment qu’entamenè eth projècte. Existissen ligams emocionaus e familiars damb Aran, e i volie rénder omenatge. Estudiè es corsi basics d’aranés e actuaument ne contunhi d’apréner online. Damb aguest nivèu basic, elaborè un prumèr brolhon e m’adrecè tath Departament de Lingüistica deth Conselh Generau d’Aran que, des deth prumèr moment, s’i mostrèren favorables e molt collaboradors. Sense eth sòn supòrt non aurie estat possible d’arténher un conde en aranés tan polit. Eth conde se compartic damb es mèstres des escòles araneses e damb eth centre de recorsi pedagogics d’Aran entà que i aportèssen esmenes; d’aciu sorgic era tresau edicion qu’includís letra de pau e letra d’imprenta; s’afavorie tanben era lectura en tot eliminar determinadi hons de colors e s’i adaptauen bères expressions e paraules quotidianes. Eth resultat ei molt polit e lèu, tanben a peticion des docents aranesi, se publicarà en version àudio entàs mainatges mès petiti e entad aqueri que presenten besonhs educatius especiaus
(https://www.jaumeespi.cat/galetes)
5.- Auetz pensada bèra activat de promocion deth libre (presentacions en escòles)? A on podem aquerir eth libre?
Eth conde a arribat en moltes escòles infantiles e mairaus, e era recebuda des deth prumèr moment a estat incredibla. Ena dusau edicion e per indicacion de bères mèstres, s’i includiren diboishi des galetes protagonistes entà colorar; aquerò, as mainatges, les encantèc. Se hec ua prumèra presentacion en ua escòla de Vic e ua auta en un escòla de Mollet, e era repercussion de totes dues siguec sensacionau. Normaument, quan ac trabalham enes escòles, es mèstres, dempús, m’envien fòtos e vidèos deth resultat; n’i a que m’an emocionat un pialèr. Eth conde se pòt aquerir privadament en Amazon (https://amzn.eu/d/9pvbDbE), e entàs escòles e centres era comanda se pòt hèr dirèctament a jo (espijaume@outlook.com) o a Odense Books per mail o per telefon (odensebooks@gmail.com).
