Mossèn Jusèp Condò Sambeat (1867-1919) ei eth gran escrivan classic der Aran. Entà arténher ua major difusion dera sua òbra, s’a publicat era version catalana d’“Era Isla des Diamants” (“L’illa dels diamants), revirat per Joan Calsapeu i Cabot.
Apareishut en Voliana Edicions, eth libre compde, ath delà deth tèxte catalan, damb er originau aranés entà qu’es lectors catalanoparlants posquen familiarizar-se tanben damb era lengua occitana ena sua modalitat aranesa.
Era òbra, qu’eth sòn manuscrit originau ei der an 1912, s’enquadre laguens dera sciéncia-ficcion e dera imaginacion futurista, un airau non guaire tractat ne laguens dera literatura en lengua occitana ne tanpòc ena catalana.
Coma simbèu d’aguest engenh futurista, remercam sustot era preséncia d’un automobil que vòle, mès que tanben pòt convertir-se en un vaishèth propulsat damb energia electrica.
Damb aguesta revirada en catalan, auem ua prepausa fòrça interessanta entà apropar-mos tara literatura aranesa e tara òbra deth sòn gran autor Jusèp Condò Sambeat.
D’autres articles consacrats a Mn Condò Sambeat publicats a SAPIÉNCIA OCCITANA
