Era novèla mès importanta dera literatura en lengua castelhana, “Dòn Quishòt d’Era Mancha” ja dispause dera sua revirada en aranés des de hè mesi, mès eth darrèr mes d’abriu siguec presentada en Madrid e en Lhèida. Segontes er Institut Cervantes, era version aranesa ei era traduccion numèro 141 d’aguesta òbra immortau deth Sègle d’òr castelhan. Era edicion aranesa includís mès de sies-centes nòtes explicatives e es famoses illustracions classiques de Gustave Doré.
Ena capitau espanhòla er acte siguec organizat ena bibliotèca dera Fondacion Ortega-Marañón eth dia 22 d’abriu per Acadèmia Aranesa dera Lengua Occitana – Institut d’Estudis Aranesi (AALO – IEA), en collaboracion damb eth Ministèri de Cultura, en encastre des actes que se debanen cada an ath torn deth dia 23 entà commemorar era mòrt deth sòn autor, Miguel de Cervantes.
En caplòc deth Segrià, e tanben en encastre des actes dera setmana de Sant Jòrdi, eth libre siguec presentat en Institut d’Estudis Ilerdencs eth dia 24 d’abriu.
Aguesta traduccion en aranés a estat realizada per Antòni Nogués, que ja a revirat un pialèr d’òbres dera literatura universau en aguesta modalitat dera lengua occitana, jos era supervision e era correccion de Jusèp Loís Sans Socasau.
Des der Institut d’Estudis Aranesi – Acadèmia Aranesa dera Lengua Occitana s’amie a tèrme ua òbra immensa de traduccion de classics universaus en aranés. Ua manèra efectiva de méter en valor er aranés, mejançant era sua preséncia coma lengua entà poder liéger aguesti caps d’òbra.
Fòrça gràcies ar Institut d’Estudis Aranesi – Acadèmia Aranesa dera Lengua Occitana pes fotografies e pera informacion.
D’autres articles consacrats ara Acadèmia Aranesa dera Lengua Occitana publicats a SAPIÉNCIA OCCITANA
